Husflidsutstillinga

Årets særutstillar på Dyrsku'n 2019 - Mari Fallet Mosand
Saman med Norges Husflidslag arrangerer vi kvart år landets største tevling i husflid, handverk og design. Målet er å stimulere dei ulike fagmiljøa og å bidra til kompetanse-heving, kunnskapsformidling og auka rekruttering.

Foto: Mari Fallet Mosand

I 2016 feira Dyrsku'n 150 år, og kvart år får vi besøk av over 90.000 gjester og 750 utstillarar. Husflid, handverk og design er ein av våre viktige bærebjelkar, og sidan 1963 har vi arrangert tevlingar med fokus på kvalitet og tradisjonelt handverk.  

Denne tradisjonen skal vi ta vare på, samtidig som målet er å stimulere til nyskaping og rekruttering.

Korleis foregår tevlinga?

Tevlinga vert arrangert om lag to veker før marknadsdagane, og handverkarar og designarar frå heile landet kan melde seg på i ynskja kategori og klasse, uavhengig av om dei er amatørar eller profesjonelle. Vi har og eigne klasser for dei som er i ein studie- eller læresituasjon. 

Med Norges Husflidslag som fagleg ansvarleg vert dei innsende arbeida vurdert av fagjuryar beståande av dommarar med solid bakgrunn i det fagfeltet dei dømmer i. Arbeida konkurrerer ikkje mot kvarandre, men vert vurdert opp mot ulike kriterier som er tilpassa aktuell kategori og klasse.

I ei klasse kan det difor bli delt ut fleire prisar av same grad. Det vert og lagt vekt på å gje gode skriftlege tilbakemeldingar til deltakarane, med begrunnelsar for den bedømminga som er gjort. Dette kan vere med på å auke ferdighetar og kompetanse, og at deltakaren hevar kvaliteten på arbeidet sitt.

Vil du delta? Påmeldingsskjema og rettleiing til årets tevling finn du her. 



Ulike prisar
Forutan fyrste-, andre- eller tredje-premie, kan deltakarane òg vinne ein av dei spesielle prisane våre:
  • Nyskapingsprisen består av eit diplom og ein gåvesjekk på kr. 5000,-
  • Stimuleringsprisen vert dela ut som stimulering for vidare arbeid, og består av eit diplom og ein gåvesjekk på kr. 5000,-
  • Diplom for godt handverk blir dela ut av Norges Husflidslag
Alle prisane er eit heiders- og kvalitetsstempel, og blir gjeve til inspirasjon for vidare arbeid. 

Ynskjer du å finne ut meir om tevlinga? Du finn påmeldingsskjema, reglement og anna viktig informasjon her. 

Påmeldings- og innleveringsfrist er fredag 23. august. 

Arbeid og skjema sendast til Dyrsku'n Arrangement AS, Nordbygdivegen 60, 3840 Seljord.

Husflidsutstillinga Dyrsku'n
Arbeida frå tevlinga vert synt fram på Husflidsutstillinga under marknadsdagane på Dyrsku'n. Utstillinga er spennande og dagsaktuell, og syner det enorme spekteret som finst innan husflid, handverk og design i Noreg. I tillegg til arbeid frå tevlinga inneheld utstillinga:
  • Særutstillinga 2019, med tittelen «Gull frå Grøne Skogar». Utstillar er Mari Fallet Mosand, som mellom anna driv den suksessfulle bedrifta «Krokvokst» i Bø i Telemark. 
  • Elev- og studentutstilling med flotte arbeid frå elevar ved Seljord Ungdomsskule og frå studentar ved USN, campus Notodden og Rauland. 
  • Gjesteutstillarane våre er spesielt inviterte handverkarar som er med på å syne fram handverka sine på ein god måte.
  • Demonstrasjon av handverksteknikkar, i år ved særutstillar Mari Fallet Mosand. 

Pris- og premieutdeling 
Sundag 15. september er det pris- og premieutdeling med møteplass for deltakarar og handverkarar kl. 14.00 i Hall B. Publikum er hjarteleg velkomne til å sjå på utdelinga, som startar kl. 15.00.

Med dette ynskjer vi deg vel møtt til Dyrsku'n, enten det er som gjest, utstillar eller deltakar!

Relaterte Artiklar