Opninga er ei tradisjonsrik og litt høgtideleg markering av at Dyrsku’n er i gang, med hesteskyss og opptog av dyr ned Dyrskugøto, seier Marit Mæland, prosjektleiar i Dyrsku’n.
Når følgje har svinga inn framom Fjoset, er det berre å finne seg ein plass og gjere seg klar for den høgtidelege opninga.
På telemarkvis
Gardbrukar og musikar Aasmund Nordstoga skal leia oss gjennom programmet, med stev og introduksjonar på telemarksvis. Med seg på laget har han bror og artist Odd Nordstoga.
– Han er kjend over heile landet som ein skikkeleg telemarking. Vi syns både han og Aasmund passar særs godt inn hos oss, og er glade for at dei begge er med igjen i år, seier Mæland.
Talar, politikk og eit lite skråblikk
Ordførar i Seljord, Solveig Sundbø Abrahamsen, ønsker publikum velkommen til bygda, før landbruks- og matministeren står for den høgtidelege opninga med tale og ringing i bjølla.
Etter kvart skal Sandtrøen også delta i det ordstyrar Erik Aasheim kallar ein klok, politisk samtale. Kven andre som kjem for å diskutere landbrukspolitikk er førebels ikkje klart, men vi kan vente at vedkommande har varma godt opp med ein lang valkamp.
Gjævt for både folk og fe
Så blir det prisutdelingar til både dyr og mat. I år blir Seljordprisen delt ut til årets beste ku, medan Dyrskuprisen går til beste geit.
– I tillegg skal vi dele ut Johan Lindeqvists Sølvkande, som har blitt delt ut for kjøttproduksjon av storfe sidan år 1900, så det er veldig stas, fortel Mæland.
Årets mat- og drikkeprodukt er Dyrsku’n sin eigen matpris og går til ein utstillar i lokalmatkategorien. Hanen, Meny og Dyrsku’n skal i tillegg kåre Årets lokalmatgründer blant fire førehandsnominerte kandidatar.
– Dette er gjæve prisar som heng høgt, og vinnarane plar alltid å bli ordentleg glade når dei vinn.
Åtte pottar rømme, fire merker smør
– Sidan seterdrift har kome inn på UNESCOs verdsarvliste, har vi i år ekstra merksemd på seterdrift, smør og rømme på Dyrsku’n. I samband med prosjektet om setersmør skal det i år bli kåra noregsmeistrar i smør og rømme, seier Mæland.
Kåringa skjer som ein del av NM i ost, som blir arrangert i Oslo i regi av Norsk Gardsost veka etter Dyrsku’n. I år er det oppretta ein ny kategori for smør og rømme, og det er denne som vil bli dømt og kåra under opninga fredag 12. september.
Årets unge bonde
Felleskjøpet, McDonald’s og Bygdeungdomslaget deler ut prisen for Årets unge bonde, noko dei har gjort på Dyrsku’n i nokre år no.
– Nytt av året er at prisen for Årets unge bonde blir delt ut under sjølve opninga, seier Mæland.
Ho oppmodar alle om å kome tidleg for å sikra seg plass til den tradisjonsrike opninga, som blir avslutta med ein minikonsert med Odd Nordstoga.
Tid: 16.00 – 17.00
Taler, prisutdelingar og musikalske innslag
Stad: Fjoset