–I år er det Ine Eriksen Søreide som skal få lyd i bjølla. Den relativt ferske Høgre-leiaren skal halde årets opningstale, og det gjer ho sjølvsagt etter å ha fått tradisjonsrik hesteskyss, med opptog av dyr, ned Dyrstugøto til Fjoset.
I vogna får ho følgje av ordførar i Seljord kommune, Solveig Sundbø Abrahamsen, administrerande direktør i Dyrsku’n, Geir Helge Espedalen, og styreleiar i Dyrsku’n, Trude Flatland.
– Dyrsku’n har avtale med både Norsk Fjordhestlag og Landslaget for Dølahest, så det er dei som står for staskøyringa. Alna Ridesenter køyrer tospann med dølahest på opninga fredag og tospann med fjording til bryllaup på laurdag, fortel Marit Mæland, prosjektleiar i Dyrsku’n.
Som vanleg er det gardbrukar og musikar Aasmund Nordstoga skal leia publikum gjennom opningsprogrammet, med stev og introduksjonar på telemarksvis.
Skråblikk frå Are Kalvø
Inkje Dyrsku-opning utan skråblikk, og kven betre til å sjå på skrå enn forfattar og satirikar Are Kalvø. Multikunstnaren er kjend for det skarpe blikket, det syrlege språket og dei tørre humoristiske vendingane sine. Når han no tar ein titt på norsk landbruk og rurale strøk, kan vi lova både finurleg harselering og språklege krumspring. Hugs å varme opp lattermusklane i god tid!
Prisutdeling for mat og dyr
Seljordprisen blir delt ut årleg til eit på førehand bestemt dyreslag, og i år går han til geit. Prisen vart oppretta av Seljord kommune i 1969, og vinnaren får eit tresnitt av Terje Grøstad.
Dyrskuprisen blir delt ut årleg til dei dyreslaga som ikkje omfattar årets Seljordpris, som denne gongen er ku og hest. Prisen er ei gåve frå Samarbeidsrådet for Buskerud, Vestfold og Telemark og Telemarks Landbruksselskap og har vore delt ut sidan 1999. Vinnaren får ei sylvskei og diplom.
Årets unge bonde har vorte kåra under Dyrsku-dagane i fleire år, og slik blir det også i år. Og akkurat som i fjor skjer sjølve kåringa under opningsseremonien. Prisen er eit samarbeid mellom Norges Bygdeungdomslag, Felleskjøpet og McDonald’s Norge og har som mål å heidre unge bønder som viser veg for norsk landbruk.
I tillegg skal TINEs Bærekraftpris for 2026 delast ut under opninga. Prisen er ein heiderspris for framtidsrette mjølkeproduksjon og går til eit mjølkebruk som utmerker seg ekstra innan agronomi, klima, miljø og dyrevelferd.
Kvart år delar Dyrsku’n ut sin eigen matpris til ein av utstillarane i lokalmatkategorien: Årets mat- og drikkeprodukt. I tillegg kårar Hanen, Meny og Dyrsku’n Årets lokalmatgründer blant fire førehandsnominerte kandidatar.
Vakre tonar frå Vinje
Til slutt blir det jubileumskonsert med ei av Noregs mest folkekjære artistar – Ingebjørg Bratland. Ho starta å kvede allereie som femåring og fekk mellom anna undervisning av Ellen Nordstoga, som er sagt å ha vore den viktigaste læremeisteren hennar i oppveksten. Mange kjenner Bratlands stemme frå tv, og ho song mellom anna tittelmelodien i NRK-serien «Jul i Svingen», skrive av eit anna blad Nordstoga – Odd. Dei to har seinare samarbeidd på fleire album.
Fredag Fjoset
- Hesteskyss inn på Fjoset
- Opningsprogram med talar, utdeling av prisar og underhaldning
- Skråblikk med Are Kalvø
- Politisk debatt, leia av Erik Aasheim
- Kl. 18.15 Konsert med Ingebjørg Bratland
Prisar som blir delt ut under opninga
- Dyr: Seljordsprisen til beste geit, Dyrskuprisen til beste ku, Beste ku frå gardsdømming, Hans Kleppens vandrekrus frå Telemark Landbruksselskap
- Mat: Årets matprodukt, Årets lokalmatgründer
- Andre priser: Årets Bærekraftpris frå Tine, Årets unge bonde frå Felleskjøpet, Den nasjonale kulturlandskapsprisen 2026 m.fl.