Bilete: Geir Helge Espedalen og Marit Mæland frå Dyrsku’n delte ut Heidersprisen 2025 til vinnaren Barbro Tronhuus Storlien. Foto: Mona Kasin.
Dyrsku´n sin Heiderspris blir delt ut til personar eller lag, som i tråd med tema for husflidsutstillinga, har utmerka seg med å løfte fram handverk og tradisjon gjennom engasjement og formidling. Kandidatar blir nominerte gjennom Dyrsku’n, Norges Husflidslag og andre fagmiljø. Årets tema er bunad.
Årets prisvinnar er nominert av Studieforbundet Kultur og Tradisjon. Vinnaren har gjennom fleire tiår vore ei samlande kraft for bunad, handverk og immateriell kulturarv. Med brei fagkunnskap, varme og formidlingsevne har vinnaren inspirert tusenvis – både gjennom kurs, undervisning, bøker, blogg og samfunnsdebatt.
Vinnaren har halde eit imponerande tal kurs over heile landet, og vore sentral i Bunadopplæringa. Vinnaren har også bidrege i læreplannemnder, prøvenemnder og som fagleg utviklar for nye bunadtilverkarar. I tillegg har vinnaren vore ein synleg og tydeleg leiar for Norges Husflidslag i ei krevjande tid, og har løfta bunaden som både handverk og berebjelke i kulturarven vår.
Vinnaren har òg markert seg sterkt som forfattar og formidlar og skriv jamleg for fagbladet Norsk Husflid. Vidare så har vinnaren gjennom sin blogg i 16 år delt kunnskap, refleksjonar og debattar – ein viktig informasjonskanal innan bunad- og handverksmiljøet.
Forfattarskap, samfunnsengasjement, kunnskapsformidling og eit utrettelig arbeid for å halde tradisjonane levande gjer at årets prisvinnar står som eit førebilete i norsk handverks- og kulturarvsmiljø.
Årets heiderspris går til Barbro Tronhuus Storlien.
Som teikn på heider og takk får du bjølla – Dyrsku’n sitt symbol på kraft, tradisjon og fellesskap.
Me gratulerer!