«Frå tradisjon til moderne, grenselaust og berekraftig» er årets særutstilling i Hall B. Her løfter vi fram reparasjon, redesign, gjenbruk og upcycling – med utgangspunkt i kunnskap og tradisjonar som har vore viktige i generasjonar.
Husdyra er sjølve hjartet i Dyrsku’n – slik dei alltid har vore. I år blir det igjen høve til å oppleve både ku og geit i levande live på Dyrskuplassen, samstundes som fleire produsentar får moglegheit til å delta gjennom gardsdømming.
Ein tur til Sterke Nils-tunet er nesten som ei reise i tid, der du kan sjå korleis det gode, gamle også kan få plass i framtida. Her finn du nokre av dei klassiske, norske husdyra og tradisjonelle aktivitetar for heile familien.
Velkomen til Hestevegen – ein beredskapsveg og rettstrekke for islandshest i eitt. Den nye vegen gir enkel tilgang for dyra til det nyaste området på Dyrskuplassen, E500. Hit flyttar TYR heile arenaen sin, der du kan lære om kjøttferasane, sjå temjing av dyr og westernriding. Og mykje, mykje anna.
På Røyse har frukt og bær vore ein del av landskapet i generasjonar. Når årets avling er moden, startar nokre av dei travlaste vekene i året på Røyse Bærpresseri.
I eit ti gonger ti meter stort konferansetelt kjem du no bokstavleg talt tettare på maten. Arenaen er ny av året og byr på eit rikhaldig program for den matinteresserte.
I år spirer det og gror som aldri før på Dyrskuplassen, og matansvarleg André Trondsen gler seg til å vise publikum korleis maten vår kjem seg frå jord til bord. På Dyrketunet fyllest over 60 plantekassar og ein 120 kvadratmeter stor dyrkingstunnel med alt frå bøner til vassmelon.
Begge hadde ein aversjon mot alt romantisk og klissete, men då dei møtte kvarandre, fekk alle klisjeane brått ei meining. No skal Malin Aarhus og Gisle Bangsund feire kjærleiken på Sterke Nils-tunet, kor dei smis i hymens lenker laurdag kl. 15.00.
Vi gratulerer Iselin Mentzoni Eliassen og Jørgen Juul Thomassen frå Buktenes gard i Troms, som er kåra til Årets Unge Bonde 2026.
– Vi satsar på at det blir ei framsyning med godt skrelte poteter og ikkje skrelte fingertuppar, seier Jan Thorsen i Telemark Bondelag, som saman med Nationen og Dyrsku’n er ansvarleg for TettPå Landbruket – staden for politiske debattar, interessante samtalar og underhaldning.
Hest er best, ifølgje munnhellet, og for nokon er det verkeleg lett å sjå at desse firbeinte favorittane gjev livet noko ekstra. På Dyrsku’n kan du sjå både den beste kaldblodshoppa i landet og den vakre og anvendelege fjordingen.
Vi gratulerer Superkraftmat frå Nes på Hedmarken i Innlandet, som er kåra til Årets Lokalmatgründer 2026. Vinnaren blei kåra fredag under Dyrsku’n. Gründerprisen er etablert av MENY og HANEN, i samarbeid med Dyrsku’n.
